سوالف بالمحكي

مع الأديب محمد عزوز و : سوالف بالمحكي
(7)
 هون .. مو .. هونيك

– تعي نروح مشوار 
– مشوار ..!! لوين ..؟
– مشوار ع هديك الخربة ..
– يا سقلي .. مشوار عالخربة ..؟! وأنا واياك لحالنا ..؟
– إي .. وشو فيها ..؟
– قال شو فيها قال ..؟ فيها كتير ..
– خايفة مني ..؟
– لا .. خايفة من الأهل والجيران إذا شافونا ..
– وشو بدهن يقولو يعني ..؟
– شفناهن بالخربة مع بعض .. لحالهن طقة الظهر ..
– إي .. وشو يعني ؟
– لسا بيقلي شو يعني ..؟ القصة ما رح توقف هون ..
– وخليها ما توقف .. لوين بدها توصل ..؟
– يعني ما بتعرف لوين بدها توصل ..؟
– لأني بعرف .. عم قلك تعي نروح .. ويصطفلو هنن يرسمو اللي بدهن ياه .. 
– شو هالحكي ..؟
– … 
وما كبرنا ، وضلينا هون ، وما استرجينا نروح لهونيك ..
ولما كبرنا بعد شي كم سنة .. كبرت أشواك الخربة ، وصار ورا حيطانها أسرار 
 ولساتنا هون .. ألله وكيلكن هون .. مو .. هونيك