حكايات ع دراج الفلّ

أميمة إبراهيم إبراهيم

قلّا : بعزّك قد الحزن بعيون اليتامى

قالتلو: بحبّك قد الفرح بعيون اليتامى ساعة يدق ع بوابن ضيوف

محمّلين اللعب

و الهدايا.

قلّا : يامَيّة ل بعد العطش

تغلغل بعروقي

قالتلو : يادمّي انت بشرياني ووريدي.

وطلع الضو…

وهوي يقلّا… وهي تقلّو

وبحبشو عَ وراقن تَ يكتبو القصيدي

لا لقو قلامن

ولا لقو القصيدي

صارت كلماتن حكايات ع دراج الفلّ

وصارت الحكاية تدوّر بهل حقول

من زهرة لزهرة

ومن حبقة لحبقة

لصارت حكاية عشق

مخبايي بتنهيدة.