في رثاء الشاعر الشعبي العراقي العملاق عريان السيد خلف
كتبوا عن رحيلك و انا كتبت :
من بعدك
جنح طير الشعر عريان
يا عريان
خالي الريش
وين يعيش
صعبة يطير
كفيف بليل شتوية
يون بردان
يا عريان
من بعدك
نبض گلب الشعر تعبان
ضعف نبضه
اذا شافك
نخل يابس
على ارضه
سواد الثوب
لبست دجلة بفراقك
و شمع فوق الفرات يطوف
يمكن يرجع الغايب
عن الخلان
يا عريان
يا عريان
يا عريان
يا عريان
اذا چان الشعر ديوان
احط اسمك على العنوان
و اذا چان الشعر ولهان
على صدرك يظل نيشان
و اذا چان الشعر مركب
عليك ينادي يا قبطان
و اذا چان الشعر بيرق
ثبت بيدك على الميدان
مشيت و تارك حروفك
اثر باقي بدفاترنا
دمع شوق بمشاعرنا
وله و الذكرى تكسرنا
قدر دوم العراق يظل
متوالف مع الاحزان
و يظل حبر القصايد
ينزف القربان
يا عريان
يا عريان
يا عريان
……
* صفوان العثمان
…..
6 كانون ااول 2018
