أميمة إبراهيم إبراهيم
الغيمة حكاية
والقمر ناطورها
مفتاحها بعب السّما مخبّى
بغافل الناطور
وقبل مايطلّ الصّباح
بمد ايدي تَ اسرق المفتاح
وافتح بوابا.
………
باب الحكي
مشرع للضو كلماتو.
باب الغناني
بيحنّ ع عودو
وميج يابو الميج ويابو الميجانا
هل بلاد الحلوة هاي بلادنا.
وباب العشق
فتّح زهورو
وبحمرتو شهق ملتاع.
وباب الغربة
صافن وحزنان
ولادو بالفلا هجّوا
و بالسما طارو وطيّروا.
وباب الوطن
سكران
بمحبّة ولادو .
…… ..
يابواب لا تسكري
ضلّي مشرّعة للحب
واسكبي بقلوبنا
حكاياتك.