الشاعر ثائر محفوض
سوري أنا وأنت أخي وسوري
بشوفك بعيني النّور يانوري
أوعى تخلّي بيننا يفرّق حدا
لا شيخ لارهبان لا خوري
يالله عا كمشة ورد بدنا نلتقي
ياسمين مع منتور مع جوري
جوّات قلبي بعمّر قصورك
وجوّات قلبك زيّن قصوري
نحنا بحديقة كلها أطيار
وحلوات غزلو الشّمس جدّولي
متل الكنار بهالدّني خلّيك
أوعاك تلحق شقوة الدّوري
الدّوري وأمير النّفط متفقين
بينزلو ببوري بيطلعو ببوري
إن حاولت تحرقني بجمر النّار
عالجّمر بفلش عطر بخوري
ويللي اشتراه الغير بالدّولار
مأكّد في عندو جد تيموري
ياحيف صرنا بزمن عقلو اختل
والخوف شيّب ريش شحروري
سمعتو بسوري بيت خيّو احتل
وسوري حمل ساطور عالسّوري
سمعتو بسوري خان عهد الفل
وكسّــر بقلبــي قونــة عطــوري
السوري ياابن الشّمس مابتنزل
بالأرض جذرك عانق جذوري
حروف الشّعر منّي إلك بتضل
بعطر البنفسج حبّر سطوري
اسمي الشّمس عم دور فوق الكل
انحفرت لغات الأرض عاصخوري
عالدّني نور الفجر منّي طل
وعالبحــر صبّتْ ميّــة نهـــوري
شو هم لو عالبحر خيري هل
ما البحر سوري والنّهر سوري
والأنبيا بالأصل سوري الكل
لك والرّب حتّى بالأصل سوري
