عطر …!
امبارحْ لمحتِكْ واقفةْ
لحظةْ على الشُبّاكْ
إيدِكْ ع خدِّكْ
ساهمةْ
وبتفكّري
بِ حلْم عَ قدِّكْ
شفتْ الزّهرْ كلّو عم يطلّع على شالكْ
وريحةْ عِطر ولهانْ
بتموج كُرمالكْ
حبّيت اندهلك:
تعي لنروحْ
قلّك شعرْ
وانتِ على مهلك
تومي بايدِكْ:
يا رفيق الرّوحْ
شو بحبّ تغمر هالخصرْ
وتبوحْ
لو راح كل الكون ما بهتم
ما دمت انّك واقف قبالي
تضحك معي
وتدلني
تَ حسّ بيحالي
وتترك عَ إيدي عطرك المسفوح!
