شحلاتك يالأمس وشحلات ذكر الطيبين
صدق وفاء وحنيه وعطف لابسين
صحيح ربينه بفقر وبيوت من طين
بس الكل عدل وزين ماشين
سكفنه بخوص النخل واحنه مكيفين
ودواوين من كصب وحياطين من طين
بس بيهه شهامه ومرجله وحنية الطيبين
وبطين الخرايب تدري شكثر مرتاحين
لاقال لاقيل ومن المنافق خلصانين
اليوم بقصور وكاشي وطوابق كاعدين
غيبه ونميمه وكطع حرام مثل السجاجين
ياماضي متى تعود وبيك شكثر مرتاحين
اليوم حزن ودمعات حتى بالعيد مو معيدين
الابن عاف ابوه والأخ ترك اخوه وكلهم ناسين
رضاعة قواطي ولصلة الرحم مضيعين
الجار محارب جاره والدنيا بعازه واحنه موزينين
قلمي
خضر عباد الجوعاني
العراق
