خمووو2 /استكشاف

المهندس سائر مقصود

خمووو2 /استكشاف
حكاياتنا ما بتخلص ، ويمكن البعض يفكرها عم تتطور مع الاحداث
اي دوما الماضي بيتطور مع الحاضر وبيتغير مع كل تغير بالنظرة للمستقبل ، بدك تقلي مو صحي
يا حبيبي شوف القراءات التاريخية مثلا لنفس الكاتب كيف بتختلف باختلاف مزاجه ومصالحه وبيئته ووو
شو بدنا بهالحكي التقيل ، خلونا يا عمي ب خمووو 2 ، نفسه تبع الحريق
هاد بيوم من الايام حب يلعبها مغامرة ع التقيل، جمعلك ولاد هالحارة اللي اصغر منه بالعمر ، وقرر يقود مغامرة بعيدة عن الحارة جكارة باعداءه بالحارة " الساطور الاحمر" و "عطا عطالي " ، هي الاسماء الحركية للشباب
اي اي اسماء حركية ، أي ولاد هيديك الحارة اللي ع طريق الشاطئ الازرق كانوا سابقين زعماء الحرب الاهلية اللبنابنية بالاسماء وبالصراع وبالتنظيم … يعني يمكن اذا دققت اكتر بتاريخ فترة الحرب بلبنان بالتمانينات يطلع معك انه فيه افكار وافعال مسروقة من ولاد هالحارة سواء بلعبة الغميضة او لعبة "السبع حجار" ، أو لعبة الخريطة اللي الها حكايتها بعدين منشان ما نتأخر عليكم ونطول السيرة اكتر واكتر ..
تنرجع لخموو2 والمغامرة
بيوم من الايام جمع الفريق تبعه منشان المغامرة الكبرى "زيارة الشاطئ البحري لاستكشاف الاعداء "
شكل خموو2 الحملة الاستكشافية وقسم الولاد لتلت فرق :
فريق المقدمة من السريعين بالركض منشان اي طوارئ ع الطريق بيرجعوا راكضين يخبرو الجماعة ، اي اي طوارئ يعني متل شي خيتار من الحارة طالع كذورة بحر ، او شي رجال بالصيد او شي مارق بالمنطقة ، ما بدهم حدا يخبر عليهم اهاليهم وينهم
والفريق التاني الفريق الخلفي من هيدول اصحاب النظر الساقب اي اي ، منشان يشوفو اذا لاحقينون جماعة الساطور وعطا عطالي ، يعني تخيلو جماعة طالعة جولة استكشافية ما تغطي حالها من الجواسيس
وفريق تالت هوي فريق القيادة بياخود المعلومات من الفريقين الاول والتاني وع اساسها بيعطي اوامر التحرك
وبما انه لا خموووو 2 ولا فريق القيادة تبعه عارفين لوين رايحين اقنعو الفريقين بانه التحرك سري للغاية
وبنفس الوقت خمووو 2 بلش يحسب خط الرجعة
ولك اي اي خط الرجعة ، بدك تقلي ولد بيحسب خط الرجعة ورجال مشوربين ما بيفكرو اساسا بخط رجعة ، ولك هاد خمووو2 ولا تنسى ابوه ممكن يليخو قتلة يطلع فيها كل تعب شغله ، ويمكن يخسر قيادة المجموعة تبعه لصالح الساطور وعطا
اي تنرجع للمغامرة
وصلت جماعة خموو2 لمنطقة مهجورة قفرة نفرة رمل وشوية اعشاب شوكية وبعد منها بشي 100 متر شط البحر اللي مرمية عليه سفينة قدييييمة لامع لونها البني من بعيد ع الصدأ
ومن ع اليسار حاجز صخري ومن ع اليمين طريق الزفت
ومنشان تكون المغامرة مغامرة أمر خموو2 جماعته الاتجاه نحو السفنية زحف منشان الاعداء والقراصنة والجواسيس وكل واحد حامل بايدو صنوف السلاح المتنوع حجرة ، عصاي صغيرة ، قطفة شوك ، يعني السلاح المتوائم مع البيئة ، انتو بتعرفو لكل بيئة سلاحها …
اي يا معلم وبلشو هالمظبلطين الزحف ، بتذكر انه فيه واحد من الفريق بعد ما كبروا اخد اجازة مكافئة بالعسكرية لانه طلع الاول بالزحف بحقل تطعيم معركة
وخود ع تعليمات واوامر وتغطية طريق الزفت من شي هجوم مفاجئ يعني من شي حدا من الحارة مارق ، وشي تغطية هجوم من جهة الصخور يعني شي صرطعان او شي صياد او شي تنين عشاق مثلا
وصلو الشباب ع السفينة المهجورة
طلع فريق الهجوم وضل فريق الدفاع عن القائد خمووو2
السفنية مؤمنة صرخ فريق الهجوم
طلعو كلهم وبلشو استكشاف
ما شافو شي يا حسرتي خردة بخردة حديد مصدي بحديد مصدي
ولا بيصرخ واحد من هالولاد : ملقط ملقط… ملقط غسيييييييل ، بس انا ضايع ما بعرف وين وبلش بالبكي
وضل يصرخ لبح صوتو لعرفو يوصلولو ، الاخ لاقى متل باب صغير فات فيه واخدته الحمية وضل يفوت ويطلع شاف حالو محبوس بين اربع حيطان حديد وسقفو السما
المهم قدروا يوصلولوا هني فوق وهوي تحت بهالهاوية انتشلوه انتشال الله وكيلك ، واحد شلح بنطلونو ورفعوه رفع .
اخد خمووو 2 هالملقط من ايد هالسبع
جمع الفريق ، ومتل اي زعيم نبه الكل انه بحالات الاستكشاف او الحرب ما بيصير تتفرقو او كل واحد يروح ع كيفو ، هالمرة قدرنا نشيلك بس المرة اللي جاي ممكن تضل محلك لتصير هيكل عظمي وياخدو راسك القراصنة ….
بلع ريقو من الخوف طبعا ، بس ما بدو يبين لفريقه ، بس ليخبي ع حاله قلهم عطشنا لهيك الانسحاب كل تنين لحالون ، منلتقي براس الحارة .
وصل ع الحارة واذا اخوه عم يدور عليه ، ابوه اجى من السفر ومدري مين خبره انه شافوه اخد ولاد صغار برا الحارة
بلع ريقه الولد ، وركض ع البيت وبايده الكنز عفوا الملقط …
وصل ابوه جاقر عيونو ومعفرت جبينو وناطره
-وينك
-كنا لاحقين الحرامي
-اي حرامي
-اللي سرق الملاقط، قدرت جيب ملقط ومسكوه بالحارة اللي جنبنا
-يا حيوان انت شو خصك بالحرامية ، عطيه لامك ، وشحارك وياويلك بقى تروح محل
تاني يوم الصبح جمع الفريق وقلهم هالحكمة
"عمرك ما تروح مغامرة ما تجيب شي يساعدك بالكذبة تبعك "
ولان حكايات الماضي الها علاقة بالحاضر وبالمستقبل ، هيك بلشت مغامرة قذارة اوربا وراحوا عملوا امريكا وهيك كفت امريكا المغامرة ع العالم كله