![](/userfiles/0(21).jpg)
![](/userfiles/23227125_1529618720452364_1776266733_n.jpg)
غيرة
بغار عليكي ..
فوق التصوّر والخيال
ومن الهوا الفوق التلال
إذا وجهك عكس..
ضو الهلال.
من الحمرة الــ على خدودك
ومن الوشم يلي على زنودك
ومن بخلك وجودك
ومن الطير لفوق أرضك..
أو على حدودك
ومن الحمرة الــ على شفافك
ومن كل حدا تطلع وشافك
ومن سكون الليل..
وضو النهار.
بغار من لونو لأنو..
بيشبهك زهر الجلنار.
من الكحلة عَ رموش عنيكي
من الوردات لما صوبك يميلو
من النسمة إذا حولك..
بتلفلف وبتدور.
وبغار لما تشمي..
الحبق أو المنتور.
بغار من سمّاعة الدكتور
بغارمن أمك..
ومن الجيران.
ومن صورتك لما بتعكسا ميّة الغدران
اعذري الــ بيدوب أو بيغار
وشكري للباري..
مسير الأقدار..
يلي عطاكي أحلى جمال
تايبهر الأبصار.
*حمص: سليمان الحكيم