* صباح الخير
أنا مشتاگ ..
منو غيرك احنلَّه ؟
دموعي دوم اخطلَّه
رسايل شوگ و آگلَّه
انا بلياك صدري ضاگ ..
أنا مشتاگ ..
غفى دمعي وسط العيون
أنسى .. و الفراگ يهون
لكن ليش من يحچون
و مر طاريك .. دمعي فاگ ؟
أنا مشتاگ ..
مشتاگ لصباحاتك
روحي تطوف حاراتك
للمعلگ ولفراتك
و غيرك للگَلُبْ ما راگ ..
أنا مشتاگ ..
صباحك يا وطن اخضر
چاي بهيل و مخدَّر
و ريل الياس و مظفَّر
و سلامات و أغاني عتاگ ..
أنا مشتاگ ..
صباحك يا لحن مجروح
ياصوت من الالم مبحوح
على غيابك شيصبر الروح ؟
فراگك مُر ما ينطاگ
أنا مشتاگ ..
صباحك يابو حنيَّة
أبوذيات و موليَّة
و كُحُل بعيون ديريَّة
حزينة من أثر الفراگ ..
أنا مشتاگ ..
صباحك يا ملك لاوطان
لوز و مشمش و رمَّان
و صالح يفتح الدكان
يصيح بصوته يا رزاگ ..
أنا مشتاگ ..
على شطك چنت اغفى
يَهالمايك ذهب و أصفى
دوا .. و لعلتي وصفه
و لجروحي يصح ترياگ ..
أنا مشتاگ ..
دموعي غرگن ثوبي
وحيد و موحشة دروبي
عجب يلتم يا محبوبي
شملنا و ننسى كل فراگ ؟
أنا مشتاگ ..
تظل بگليبي تنهيدة
حزينة و كلش وحيدة
جرح .. و أيامنا تزيده
نزيف محمَّل بأشواگ ..
و أظل أشتاگ ..
و أ ظ ل أ ش ت ا گ
ــــــــــــــــــــــــــــــ
* محمد العايش ..