القلبْ مرعى خصبْ .

زهير خيربك

سألتني عرافةٌ : همّكْ عالولدْ ..ولّا عالبلدْ ؟ قلتلها :

أفكارْ زخّاتْ المطرْ ….تسقيْ بْصدري سْهولْ …

ينْبتْ عشبْ ..

والقلبْ مرعى خصبْ …

والهمومْ خْيولْ .

برموشْها رفّ القلقْ … والحكي عَشْفافا انْدَبَقْ

ترمي الوَدعْ من إيدها … وبعيونها سر ّ انْغَلقْ

……………..

طَلّعتْ فِيّي وشَرْدتْ بالفضا …

تحكي .. تحاكي الماحدا ..

مدري عَمْ تْشوفْ القَدَرْ ..مدري عم تْحسّْ القَضا

شْويّْ …..ويعودْ الصّدى ..

تتْشَربكْ خْيوطْ السّما …

تتسكّرْ بْوابْ المدى ..

تْلمّْ الوَدعْ وتقولْ :

قضّيتْ عمري نَبّشْ الأسرارْ …

أكشف المستورْ بالأقدار .

وْحَقّ اللي وفّى لو وَعَدْ …

وْعَوجه الميّ …هالأسمو جَمَدْ ..

كلشي تعبت ..

ما كنت أعرف وين رايح هالبلدْ

(العمل خشب زيتون )