نزلْ المطرْ …

زهير خيربك

.

وكل حبّة مَيّ حامْلِة حكايِة ..

حْكايات خبّاها الهوى ببيوت ربْيِتْ عالسَّهرْ

شْبابيكها ضَوّ القمرْ والغيم برداية .

نزل المطر …

يكتبْ قصيدِة …

الحبرْ منْ لونْ السما ..

     .. والدفترْ وراقْ الشجرْ ..

                  … والريحْ محّاية .

نزل المطر ..

يسقي الزرعْ ..

    .. ويلمّعْ خْدودْ الحجرْ ..

   .. يوَقِّعْ لنبع الميّ عَ وْراقْ السّفَرْ ..

وتأشيرتو بْمجرى النهر لَورود دفلاية .

نزل المطر ..

وناطرْ أنا ينزل مطر غير المطر ..

يروي العقلْ ..

       ويغسّل نْفوسْ البشرْ ..

يْروح جوا الروح …

        .. يسألا وتبوحْ :

تْعبنا … تَعَّبنا وتِعّبنا القدر ..

وياريت لما نلتقي ..

لانحنا نذكر اللي صار

       … ولا هوّي يقول شو الجايي .