“اصنعي فرحك

أميمة إبراهيم إبراهيم

‏

بيقلي :”اصنعي فرحك

ولا تزعلي“.

بقلّو:

بمصنع قلبي ياما لوّنت حكايات

وياما للحلم خيّطت شراشف ومخدّات

ولقوس القزح عملتلّو جناحات

وطيّرتو ت صار أعلى من القمر والنّجمات.

بس هالقلب ضايج وحزنان

ومن القلق كتيييييير كتير حيران

تبدلت يارفيق روحي هالأيام

وماضلّ غير الوجع ينتف صوف الزمان.

مننطر بكرا يجي أحلى

ومننطر فيروز تكتب بصوتها عالحور العتيق

ومنسأل عن غناني الحب

تخمين ضاعو

أو يمكن تخبو من وحشة الأيام.

ومنحلم بيوم جديد

وأساورو المشغولة بذهب المحبة

وبلون العقيق .