الشاعر سليمان جمعة
تعا نسرح بالبرية
نقضي نهار بعين الشمس
نسرح بالجرد الفلا …نتعمشق صخور وتلال
عبايتا الغيم ….
وصدى معيق شلاع المعزى …..ورعيان عم يتسلوا بأوف وغنية
نشم نسمة نضيفة
نسرح العين ببلاد …حدودا مخباية بالتعب
بقعدة بفية جب ملول وكرعة مي باردة واوف ورقصة بلدية
وشمة عرق زعتر ..بتشق القلب ..وركية وغفوة …عحجر …شوية
وما بيخلى الامر من طلة تعلب من راس الشير ببحلق فيك بيدير ضهرو وبيفل
ومن زعيق معركة واووية….وتشميسة حردون وسحلية …وملت حية شقرا
حست بدعسة مئذية ..ونقزة حجل بتنقزك قد ما هيي صاروخية
كفي ركيتك
وقوم تانفل خلصت زوادتنا
وعتمت العين بكرا بنرجع صبحية
