انا ما نسيان انو اليوم عيد ميلاد البعث، بقلم المهندس سائر مقصود

ع فكرة

وحياة كل يوم قضيته بمدرستي الابتدائية اللي كانت ع اسم شهيد ما نسيان انو اليوم عيد ميلاد البعث
وحياة العصي من آنسة القومية اللي ما كانت تداوم قد ما تهرب ما نسيان انو اليوم عيد ميلاد البعث
وحياة كل يوم قضيته مع رفقاتي بالطلائع وكنا نغني ما نسيان انو اليوم عيد ميلاد البعث
وحياة كل يوم قضيته بمدرستي الاعدادية والثانوية اللي كانت كمان ع اسم شهيد ما نسيان انو اليوم عيد ميلاد البعث
وحياة أيام الجمعة اللي كنا نجتمع فيها بالشبيبة بالعمل الطوعي ما نسيان انو اليوم عيد ميلاد البعث
وحياة بدلة الفتوة وايام معسكر العاشر وتراب الطريق اللي انشق بنص الجبل /ناحية القساطل/ ما نسيان انو اليوم عيد ميلاد البعث
وحياة ايام الفرح بنادي المسيرة وكل ساعات ومبادرات وضحكات رفقاتنا بوحدة اللواء /لواء اسكندرون / ما نسيان انو اليوم عيد ميلاد البعث
وحياة العشر سنوات اللي ما دفعت فيهم اشتراك وما حاسبني البعث انو ما نسيان انو اليوم عيد ميلاد البعث
ورحمة رفيقي غياث اللي كان موظف بمكتبة مدرسة الاعداد الحزبي ومات بحادث سيارة ع طريق طرابلس من شوفير سكران كان هيدا الحادث التالت الو وكان رفيقي هوي خامس شخص بيقتل مع هيك شوفير …
وأيمان مغلظ بعدد صفحات الكتب اللي كانت معشعشة براس غياث ما نسيان انو اليوم عيد ميلاد البعث
وحياة المحبة والاخوة لكل رفيق ورفيقة تعرفت عليهم عن طريق شبيبة البعث ما نسيان انو اليوم عيد ميلاد البعث
وحياة السنة اللي خسرتها بالجامعه من ورا *حزبي* رفع فينا تقرير تغيب عن التدريب الجامعي/اللي بالأصل ما كان يداوم/ ما نسيان انو اليوم عيد ميلاد البعث
وحياة رمل الساحة بمعسكر الصاعقة لأنو المدعومين كانوا بالندوة والمطبخ ما نسيان انو اليوم عيد ميلاد البعث
وايمان مغلظ بعدد حبات الدوا والابر اللي اخدتها ببلاش من المشافي والمستوصفات ما نسيان انو اليوم عيد ميلاد البعث
وايمان مغلظ بعدد قطرات العرق اللي نزلت من كل عامل وكل فلاح من سد الفرات ل جامعة تشرين للمدن الرياضية لمحطات الكهربا وقنوات جر المي … ما نسيان انو اليوم عيد ميلاد البعث
وحياة كل بحة صوت لجندي سوري ع الجبهة وبلبنان ما نسيان انو اليوم عيد ميلاد البعث
بالاخير رح احلف برحمة وحرمة تراب كل مناضلي البعث من الاربعينات للخمسينات للستينات للسبعينات لحرمة وحرمة تراب المناضل حافظ الاسد انو ما نسيان انو اليوم عيد ميلاد البعث
بس يا ترى انتو يا رفاق متذكرين البعث قبل ما تطلعوا مبارح ببيان عن عيد ميلاد البعث
صدقا وبشرفي اللي علمني البعث ما احلف فيه عبث ما صدقتكم
بالاخير
الله يرد البعث لبعثه لو بعشر رفاق ..
أنا خلاص عليي ربي ولادي ع حب سوريا وكل مين بحب سوريا ، واحترام جيش سوريا جيشها اللي حذاء جندي شريف فيه بكرامات ملوك وامراء الدني كل الدني