بلقيس أنا
قلبي ف بعادك راح حبة حِتت
بوصلات مراكبي تاهت جوه عاصفتك
دوامة الشوق العنيدة بدون ضفاف
بحرك القلّاب من غير ميعاد ؟
حتى ع الملاح يُغّدُرُه
بلقيس أنا مابقتش أخاف
م الموج ياخدني يحضن ف قلبي ويُعّصُرُه
وتنز منه حبة حروف متبعترة
أجمعها إسمك من عصف الرياح
وكل حرف راح وباح أنا بأسمعه
جوف الصدى من لحن عصفور الصباح
بلقيس أنا مش نبي
ولا كان في إيدي ومعصمي ملك سليمان
ولا كنت إبراهيم إللي إترمى وسط النيران
ولا كنت موسى إللي ضرب بحره بعصاته وإتفلق
ولاعمري يوم راح نبي راكب براق
وف ليلة راح أقصى ورجع
ولا كنت يونس عشت في بطن حوت
ولا كنت يوم سيدنا سليمان وحركت الرياح
بلقيس أنا ساكن تابوت
من كتر سهد الشوق إليكي
حاسس كما إللي متحنط من زمن
طب إنتي ليه ما بترحمي
بلقيس أنا عمري ماهكون ولِيّ
أو عمري لحظة هكون إله
لكني بأحلم والنبي
جوه قلبي ف يوم أنا
ترجع للنبضة الحياة …..
ــــــــــــــــــــــــــ
من ديوان : عايش مؤقت ـ أحمد طليس
