بِ ضيعتنا الفل غمار
ومشاتل ورد وازهار
والحلوه لبست زنار
وزنّار الحلوه يسمين
***
ضيعتنا بِ اعلى تل
وعٓ سفوحا مات المحتل
بنتذكّر ماضينا الكل
ياما نمنا جوعانين
***
عَ البيدر نمنا ايام
ونحلم يامحلا الاحلام
نحلم بالحنطه اكوام
وننقلها عَ الطواحين
***
عَ المرج تمرجحنا كتير
وحرّاس الحنطه نواطير
لو يتمرجل عنا الزير
بيخسر….نحنا الربحانين
***
بجرن الحنطه اختي تدقْ
واختا عَ التنور ترقْ
مقلي البرغل..شعّر ..طق
معالقنا يمكن عشرين
***
والبرغل بكيّر فطور
مع بصله وخبزة تنور
والباطوس يضل يدور
ونبقى بالموسم شهرين
***
رحيّة امي تقلا…. طون
بتاكل مابتشبع لعيون
والحمّص فيها مزحون
والحنطة بتصير طحين
***
العرزال الفوق الغيمات
مربوط بشال ونسمات
وبالوادي نرعى العنزات
والزوّاده خبز وتين
***
ياما سهرنا بالشتويه
عَ حكايه صارت منسيه
ضو سراج..ونار تفيه
يضوّي ونبقى دفيانين
***
ستي تحكي لحكايه
اطول من اي روايه
تقول بآخر لحكايه
قوموا نامو ياشياطين
***
علي حيدر احمد
