اوقاتكم خير:
بما انو الناس كانت بين مشغولة وناطرة (مراجل اوباما) ، تمنيت شوف جماعة اللاعنف وشوف التيارات اللي هي مع الشعب ضد الدولة وضد التمييز بين الكروسان وعروسة الزعتر. تمنيت شوفهم كيف معزبين حالهم عم ينظموا دور الناس ع الخبز …
يعني ع الاقل هيك كانوا منعوا الجيش من اجبار الناس على النظام .
وتمنيت شوف شي حدا منهم هفت عليه نفسوا وحابب ياخود الخبز برات الدور تبع الناس ويخبرهم مثلا انو من النشطاء ، اي والله كنا شفنا النشاط وكان عايش النشاط عن حق وحقيق وكان نسي انو نشيط وما تذكر الا نشاط الفرن .
عموما ما صار شي لسى فيه شوية أزمة خبز ، صح مو متل اليومين التلاتة اللي مرقوا ، بس انو يعني فيه مجال يعبروا عن حالهم وبما انو بعض منهم ما بيعرف مثلا وين فيه افران ، رح خبرهم انو باللاذقية مثلا فيه مجموعة منيحه من الافران على امتداد المساحة الجيوبولتيك، والاستراتو-ايكونوميك …
وعموما فيه ناس بمناطق تانية جاهزة للكوميرس من غير خبز التيورسم اللي مربتط سعره بسعر الدولار تبع اوباما. …. اييه الله يرحمك يا ستي ويرحم أيامك شو كان ميزرك عامر بخبز التنور. قولك ايامكون كان فيه بركة ولا فيه محبة ولا شو كان فيه ؟!!!!!!!
