الشاعرة : فايزة معماري
تخيّل معي ….. إنو رجع آدار
والزهر شي فتّح شي بعدو زرار
تخيّل معي هالناس غفيانين
وانت وانا عشاق بعد صغار
ولوحدنا …… بهالليل سهرانين
والكاس فاضي ودار فينا الدار
والبدر هوّي ونجمتو تخمين
راحوا سوية/ي وبيعدوا المشوار
تخمين متلي ومتلك مجانين
نسيوا افتكروا الوقت بعدو نهار
وتمسك إيديّ ….. تحس بردانين
تشدّن عَ صدرك صوب لهب النار
تسكبلهن …….. انفاس ملتهبين
وأهمس بحبك يرجف لساني
وتوعى على أنفاسنا الأزهار
===========================
{{{اخذت دور الحبيب}} للدعابة هههههه
الشاعرة: نوال حريقص
يا فايزة تشخصت هاك الدار
فوق السطح والوقت بِ آذار
وانت وانا ونجوم سهرانين
ب ِساحة الضيعة مع السمار
وصف الصبايا ودَين مشتبكين
وصوت الطبل ميغالب المزمار
وشباب عم بيغازلو الحلوين
وكاسات خمر تقول بعد سكار
من خمرة الأفراح مليانين
وبدر السما عم يرسل الأنوار
والدالية وعنباتها الحلوين
وخبزات أمي وسلة الختيار
لكن ياحبي ما سكت تشرين
وقلي ياطوني هالدني مشوار
رشوا عطور العمر عالحلوين
شقديش غبيتو من الأزهار
كونوا بشهر تشرين بياعين
لا سوق لا تجار لا سمسار
حب وحنان بضاعة القلبين
عالعمر بيضلو شباب صغار
خلو النبض مضبوط عالسبعين
وضمو بعض جوا رموش العين
بيبقى الحلم عايش بهالتذكار
الشاعرة : فايزة معماري
الشاعرة : نوال أمين حريقص
